Собранието во среда ќе ги разгледа оставките на Бислимовски и Ристовска
Собранието на Република Македонија, на својата пленарна седница закажана за среда, 18 февруари, се очекува да ги потврди оставките на претседателот на Регулаторна комисија за енергетика, Марко Бислимовски, и на членката на Државната комисија за спречување на корупцијата, Цвета Ристовска.
Веднаш по потврдувањето на оставките ќе започне процедурата за избор на нов претседател на РКЕ и нов член на ДКСК, предводена од Комисијата за прашања на избори и именувања.
На дневниот ред на 85. седница, исто така закажана за 18 февруари, е и изборот на нов уставен судија. Предлогот за нов судија е Гоце Наумовски, по оставката на уставната судијка Јадранка Дабовиќ Анастасовска во декември поради здравствени причини.
Меѓу останатите точки на дневниот ред се и Предлогот за именување член на Советот на експерти на Агенцијата за супервизија на осигурување и Предлог-законот за органско земјоделско производство, во прво читање.
Пред почетокот на работата по точките од дневниот ред, предвидено е одржување на пратенички прашања до премиерот и министрите од страна на опозицијата.
