Собранието на 28 мај ќе одлучува за новиот гувернер на Народната банка
Собранието на Република Северна Македонија за среда, 28 мај, ја закажа седницата на која ќе се одлучува за изборот на нов гувернер на Народната банка. Седницата ќе започне во 11 часот, а изборот на гувернер е прва точка на дневниот ред, според информациите објавени на официјалната веб-страница на Собранието.
Како кандидат за нов гувернер е предложен универзитетскиот професор Трајко Славески од Економскиот факултет. Тој треба да ја наследи досегашната гувернерка Анита Ангеловска-Бежоска, која ја водеше институцијата од 2018 година.
Предлогот за именување на Славески до Собранието го достави претседателката на државата, Гордана Сиљановска-Давкова. Според соопштението од нејзиниот Кабинет, одлуката била донесена по консултации со сите кандидати, при што претседателката се водела од нивната стручност, интегритет, дигнитет и реалните можности за именување.
„Би сакале да потенцираме дека изборот беше тежок, со оглед на докажаниот квалитет на сите кандидати“, истакнаа од Кабинетот на претседателката.
Мандатот на гувернерот на Народната банка трае седум години. Доколку биде изгласан од страна на пратениците, Славески ќе ја предводи институцијата во наредниот период во време на важни економски предизвици поврзани со инфлацијата, монетарната стабилност и процесот на пристапување кон Европската унија.
Поддршка за неговиот избор најави владејачката ВМРО-ДПМНЕ, додека од опозициските партии веќе најавија дека нема да гласаат „за“, посочувајќи дека предлогот претставува политичка одлука, а не избор базиран на независна експертска проценка, како што било пракса досега.
