Со солзи, аплаузи и стоечки почести: Гоце Арнаудов постхумно награден со признание за животно дело на Фолк фест Валандово

Со емоции и достоинство, Фолк фест Валандово вечерва му оддаде почит на легендата на македонската народна музика, Гоце Арнаудов, доделувајќи му постхумно награда за животно дело. Наградата ја прими неговата сопруга Силвија, која излезе на сцената во салата „Јанко Узунов“, каде со солзи во очите се поклони пред сликата на својот сопруг.

„Тој со мерак пееше на овој фестивал и беше негово обележје,“ изјавија водителите Ирена Спировска и Ѓорѓи Калајџиев, пред да биде прикажана фотографија од Арнаудов на видеобимот. Во тој момент, публиката се исправи на нозе и со долготраен аплауз му оддаде почит на еден од најголемите фолк уметници што ги имала Македонија.

Гоце Арнаудов е роден во Струмица на 19 август 1954 година, а почина на 6 декември 2011. Во текот на неговата богата кариера создаде повеќе од 200 песни и освои над стотина награди од фестивали во земјата и странство. Пет последователни години беше прогласуван за најпопуларна личност во Македонија, а еден од врвовите на неговата кариера беше концертот во 2000 година, кога пред 10.000 публика пееја со него на стадионот во Струмица.

Валандово уште еднаш покажа дека традицијата, музиката и спомените за вистинските уметници не се забораваат – тие живеат вечно, во срцата на народот.