Со пасош „Република Македонија“ по 12-ти февруари нема да може да се вратите дома – ќе ви треба патен документ од конзулат
По 12-ти февруари сите пасоши на кои пишува Република Македонија стануваат неважечки и доколку се наоѓате во тој период во странство, ќе може да се вратите дома само со патен лист кој треба да го извадите од македонски конзулат.
„Доколку државјани на Република Северна Македонија кои престојуваат во странска држава (по било кој основ) и кои до 12 февруари 2024 година немаат извадено нови патни исправи (пасоши), истите можат да се вратат во Република Северна Македонија со Патен Лист, издаден од најблиското дипломатско конзуларно претставништво на Северна Македонија“, велат од МНР за ТВ21.
Од таму потсетуваат потсетуваат дека нашите државјани имаат право да се сликаат во најблиското дипломатско конзуларно претставништво во странство во кои имаме воспоставено базна или мобилна станица, преку телефонско закажување или комуникација по е-маил (Претставништва со базни станици во: Минхен, Бон, Берлин, Берн, Виена, Љубљана, Лондон, Њујорк и Чикаго. Претставништва со мобилни станици во: Брисел, Стокхолм, Венеција, Торонто и Мелбурн). Процедурата за стекнување со нова патна исправа од денот на сликање трае околу 30 дена, по што државјаните ги подигнуваат новите патни исправи во дипломатското или конзуларното претставништво каде го извршат сликањето. Во случај државјанинот да не е во можност да го подигнува патната исправа во претставништво, по негово барање и по потпишување на изјава, може истата да ја добие преку брза пошта, при што трошоците или поштарината се на негов товар.
„Оттука, ги повикуваме останатите државјани кои се во странство а кои немаат можност да се стекнуваат со нови патни исправи преку дипломатските и конзуларните претставништва, тоа да го направат во земјава (вклучувајќи сликање и подигнување на новата патна исправа), поради неможноста истите да се достават преку пошта“, велат од МНР.
4NEWS.mk потсетуваат дека рокот на старите пасоши истекува на 12 февруари и истото значи дека по тој датум, без нови патни исправи нашите државјани немаат можност да ја напуштат нашата земја.
