Со мирен собир на плоштадот во Скопје ќе се одбележат 6 месеци од трагедијата во Кочани
Шест месеци по трагедијата во кочанската дискотека „Пулс“, правната разврска добива нови димензии со обвинение и против реалниот сопственик на објектот, но граѓанскиот притисок за целосна одговорност не запира. Неформалното движење „Кој е следен?“, кое настана по несреќата, најави нов мирен собир во Скопје во вторник, 16 септември, точно на шестмесечнината од денот кога во пожар згаснаа 62 животи.
Истрагата на Обвинителството резултираше со два клучни чекори. На 13 јуни беше поднесено обвинение за Тешки дела против општата сигурност против 34 физички и три правни лица. На 5 септември, пак, беше поднесен и обвинителен акт против сопственикот на фирмата за обезбедување „Рубикон секјурити солушн“, кој се товари дека лично раководел со дискотеката, дал инструкции за употреба на пиротехника, дозволувал влез на малолетници по полноќ и работел без безбедносен план, наводно со дозвола од властите.
И покрај овие чекори, од движењето „Кој е следен?“ сметаат дека борбата за правда мора да продолжи. Тие го опишуваат настанот не како несреќа, туку како „масакр“ и „свирепо убиство од страна на дисфункционалните институции и партискиот картел“. Повикувајќи на „тивок собир и ѕвездено небо“ на Плоштадот Македонија, тие порачуваат дека „болката мора да нѐ разбесни и поттикне на акција“.
Ова движење покажа истрајност во изминатите месеци, почнувајќи со првиот марш на 18 март, преку герила акција пред Обвинителството во мај, па сè до континуираната поддршка на „Маршот на ангелите“ што семејствата на жртвите го организираат секоја сабота во Кочани.
