Смртоносен напад во Баварија: Убиен маж и двегодишно дете, напаѓачот е Авганистанец
Двегодишно момче и 41-годишен маж беа убиени во напад со нож во Ашафенбург, Баварија, во средата (22-ри јануари), додека други две лица беа тешко повредени.
Веднаш по нападот во парк, како осомничен е уапсен 28-годишен авганистански државјанин, соопшти полицијата.
Се верува дека мажот дејствувал сам.
Други детали се уште не се познати, истрагата е во тек. Полицијата се уште не го окарактеризира делото како терористичко.
Според неделникот Шпигел, сторителот се вика Енамула О. и живее во дом за баратели на азил. Таблоидот Билд пишува дека мажот во минатото бил „ментално впечатлив“.
Напад во „опасен“ парк
Смртоносниот напад се случил околу 11:45 часот во паркот Сентал, во близина на центарот на овој град со 70.000 жители. Местото на злосторството е блокирано за истрага, што влијае на локалниот железнички сообраќај.
Полицијата понуди онлајн портал каде што сведоците можат да поставуваат слики и видеа од нападот.
Во ноември минатата година, полицијата го означи Сентал како делумно „опасно место“ поради присуството на луѓе кои користат или продаваат дрога, грабежи и физички конфликти во тоа милје.
Паркот во англиски стил е со големина на десет фудбалски игралишта и е често патролиран од полицијата. Можно е, пишуваат медиумите, затоа осомничениот толку брзо бил уапсен.
