СКОПСКАТА ЦЕМЕНТАРНИЦА СЕ ВРАЌА НА ПАТЕКИТЕ НА ВИСОКА ПРОФИТАБИЛНОСТ – како УСЈЕ направи чиста добивка од 18 милиони евра за девет месеци
По минатата кризна година во која добивката беше намалена во однос на претходните, а како последица на превисоките трошоци за енергенси, скопската цементарница УСЈЕ се враќа на патеките на висока профитабилност.
За првите девет месеци од годинава компанијата оствари нето добивка од 18 милиони евра, што е раст за дури 77 проценти во однос на истиот период лани.
УСЈЕ во првите три квартали од годинава остварила оперативни приходи од над 77 милиони евра, што е за само 2 отсто помалку во однос на првите девет месеци од минатата година.
Клучниот дел од овие прихои се приходи од продажба, при што доминираат продажбите на домашниот пазар.
Но, ако приходите се минорно намалени, многу позначајно се намалени оперативните расходи на компанијата, и тоа дури за 17 проценти во однос на истиот период лани.
Тоа всушност прави компанијата да прикаже одлична добивка за девет месеци, а се очекува дека таков позитивен и подобар од ланскиот резултат ќе испорача и до крајот на целата оваа година.
Во УСЈЕ ги зголемиле и платите на своите вработени за 9 отсто, говорат податоците од Билансот на успех на компанијата објавен преку Берзата.
Н.Н.Ф.
