СКОПЈЕ СЕ СЕЌАВА: 60 години од кобните 20 секунди кои го срушија главниот град

Денеска се одбележуваат 60 години од кобните 20 секунди кои го разрушија главниот град на Македонија.

Имено, на денешен ден 26.07.1963 година точно во 05:17 часот Скопје бил погоден од катастрофален земјотрес со јачина од 9 степени по Меркалиевата скала (6,1 според Рихтеровата сеизмичка скала).

Траел точно 20 секунди, со помали потреси до 5 часот и 43 минути.

Под урнатините животот го загубиле 1.070 граѓани, меѓу кои имало и деца. Повредени биле околу 2.900 луѓе, од кои што 1.110 биле тешко повредени, а околу 800 луѓе останале инвалиди.

Од потресот биле урнати 15.800 станови, а оштетени 28.000.

Првата помош за граѓаните на Скопје дошла од војската и граѓаните на тогашните југословенски републики, а неколку дена по земјотресот започнала да пристигнува помош и спасувачки екипи од целиот свет. Точно 87 нации од светот испратиле помош во Скопје и помогнале градот да се изгради повторно, поради што го носи и епитетот „град на солидарноста“.

Денеска, и по 60 години од овој катастрофален скопски земјотрес, сѐ уште се свежи сеќавањата на оние кои ја преживеале големата несреќа. Иако поминало повеќе од половина век, граѓаните раскажуваат за разурнатите домови и објекти кои ги снемало во дел од секундата пред нивните очи.

Инаку, во својата долга историја, Скопје повеќепати пропаѓал и одново се раѓал.