Скопје останува Европска престолнина на културата за 2028 година
Град Скопје ќе ја задржи титулата Европска престолнина на културата за 2028 година, потврди денеска градоначалникот Орце Ѓорѓиевски по успешните средби во Брисел. Заедно со министрите Тимчо Муцунски и Зоран Љутков, тој оствари значајна средба со еврокомесарот за меѓугенерациска правичност, млади, култура и спорт, Глен Микалеф, каде ја претстави подготвеноста на градот за новата ера на европски стандарди и културна трансформација.
„Со гордост можам да кажам дека Скопје останува Европска престолнина на културата за 2028 година“, рече Ѓорѓиевски. „Како нов градоначалник започнуваме историска трансформација што ќе нè подготви да ја носиме оваа титула со достоинство.“
Градоначалникот посочи дека проектот бил блокиран и управуван спротивно на законските прописи, но сега процесот е деблокиран и насочен кон транспарентно и законско функционирање. Во рамки на визијата за модерно и европско Скопје, предвидени се инвестиции од над 55 милиони евра во клучна инфраструктура, меѓу кои Скопско Кале, Аквадуктот, Скупи, МКЦ, нов Европски центар за култура, зелени магистрали, паркови и современи јавни простори.
Проектот, како што истакна Ѓорѓиевски, ќе биде спроведен со независна управувачка структура, меѓународен советодавен борд и професионален тим, додека локалната соработка и интеграција ќе ги обедини сите 10 општини, училишта, јавни претпријатија, универзитети, културни институции, НВО секторот и граѓаните.
„Скопје станува еден заеднички систем, една енергија и една визија. Влегуваме храбро. Работиме чесно. Работиме за сите!“, порача градоначалникот.
Со овие активности, Скопје се подготвува да стане видливо на европската и светската културна мапа и да го зацврсти својот статус на центар за културна размена и иновација.
