Скопје и Тетово вечерва се гушат во загаден воздух – еве која е причината
Вечерва Скопје и Тетово се меѓу најзагадените градови во регионот. Индексот на квалитет на воздухот (AQI) во делови од главниот град, како кај Ректоратот, достигна дури 144, што спаѓа во категоријата „нездрав за чувствителни групи“. Во Тетово, пак, загадувањето изнесува AQI 118, што исто така претставува ризик по здравјето.
Концентрацијата на штетните PM2.5 честички кај Ректорат е 10.6 пати над дозволеното ниво според насоките на Светската здравствена организација. Овие ситни честички продираат длабоко во дишните патишта и се особено опасни за деца, постари лица и хронично болни.
Дополнително, ветерот носи загаден воздух и од големите пожари кои беснеат во Албанија, недалеку од границата со Македонија.
Што ја предизвикува оваа состојба?
На мапата за загадување се забележуваат активни пожари кај Желино, кој е меѓу главните извори на чад и прашина. Високите температури, ниската влажност (29%) и слаб ветер (10.1 km/h) дополнително придонесуваат загадувањето да се задржи во воздухот.
Граѓаните се советуваат да избегнуваат престој на отворено, особено навечер, и да користат заштитни маски при излегување. Институциите треба итно да реагираат со конкретни мерки за справување со загадувањето, кое станува хроничен проблем за здравјето и секојдневието на граѓаните.
Според најновите податоци од глобалните платформи за следење на квалитетот на воздухот, Македонија вечерва се наоѓа на 16-то место во светот по ниво на загаденост.
