Скопјанка направи апликација за јавна уметност во Скопје
Скопјанката Изабела Левенска Миљаниќ создаде платформа што го претвора Скопје во музеј под отворено небо. Новата веб-апликација – Museum of Public Art – претставува дигитален водич низ јавната уметност на главниот град, со визија да се прошири и кон други градови во земјата и надвор од неа.
Проектот произлегува од лична иницијатива, љубов кон уметноста и чувство на одговорност кон јавниот простор. Со посветено истражување, самофинансирање и часови работа, авторката започнала да ја документира историјата на скулптурите, муралите и јавните уметнички дела, обединувајќи ги нивните приказни на едно место.
Важен дел од платформата се и QR-кодовите, кои се поставуваат до самите дела, овозможувајќи им на граѓаните и туристите да дознаат повеќе за уметноста токму додека стојат пред неа. Како во музеј – но овојпат на отворено.
„Верувам дека градот зборува преку уметноста, и таа комуницира со секого – без бариери. Целта ми е на едноставен и пристапен начин да ја доближам уметноста до сите, да поттикнам љубопитност, восхит и грижа за културното наследство што нѐ опкружува“, вели авторката на проектот.
Во време на дигитални технологии и вештачка интелигенција, таа верува дека дигитализацијата е клуч за рушење на ѕидовите меѓу луѓето и знаењето. Со оваа иницијатива сака да инспирира и други да создаваат проекти со почит кон културата и јавниот простор.
