Скандал меѓу Берлин и Москва: Ќе и бидат доставени ли ракетите Таурус на Украина?
Берлин започна истрага откако руската државна телевизија објави снимка на германски офицери кои разговараат за можна испорака на ракети со долг дострел за Украина.
Ова и даде причина на Москва да ја обвини Германија дека планира напади против Русија, пренесува Би-Би-Си.
Во аудио снимката објавена од рускиот канал RT, војската коментира дека крстосувачките ракети Таурус може да стигнат до мостот на Крим. Киев долго време ги бара спорните ракети кои имаат дострел од 500 километри, но Берлин досега одбиваше да ги обезбеди за да не дојде до ескалација на тензиите.
„Ова е исклучително сериозна работа што ќе биде истражена многу внимателно, темелно и брзо“, вети Олаф Шолц, германски канцелар.
Сепак, Москва побара итно објаснување од Берлин.
„Не знам како нашите колеги од НАТО ќе му го објаснат ова на сопственото население“, коментира Сергеј Лавров, рускиот министер за надворешни работи.
Портпаролот на германското министерство за војна призна дека „тајната комуникација била пресретната“, но не одговори дали гласовите на протечената снимка биле манипулирани.
Според германското издание Шпигел, видео-конференцијата не била спроведена преку внатрешната шифрирана мрежа на армијата.
