Сириски мигрант совлада напаѓачка во Германија и стана херој

Мухамед Ал Мухамед, 19-годишен Сириец, е прогласен за херој откако совлада жена напаѓач на главната железничка станица во Хамбург и помогна во спречувањето на напад во кој беа повредени 18 лица. Полицијата во петокот објави дека на местото на нападот е уапсен 39-годишен германски државјанин, за кој се верува дека страда од ментална болест. Подоцна беше објавено дека сите повреди се надвор од животна опасност, а жената е сместена во психијатриска установа.

Ал Мухамед, кој се враќал дома во Бухолц, на 25 километри од Хамбург, откако бил во посета на пријател, чекал воз на перонот кога видел жена со нож. Тој виде како луѓето почнуваат да бегаат од жената.

„Решив да ја спречам“

„Решив да трчам во спротивна насока и да ја сопрам“, изјави тој за германскиот неделник „Дер Шпигел“. Кога се приближил кон неа, видел друг маж, за кој рекол дека е Чеченец, кој ја шутнал во коленото и таа паднала. „Ја држев долу и ѝ ги стиснав рацете за да не може да стане“, рече Мухамед. „Таа не врескаше, не се спротивстави.“

Полицијата пристигна неколку моменти подоцна. Кога го насочиле оружјето кон нив, Ал Мухамед полека се оддалечил од жената со кренати раце. „Дер Шпигел“, кој го потврди неговиот идентитет, изјави дека постапките на двајцата мажи веројатно спречиле повеќе луѓе да бидат повредени, објави Индекс.

Медиумите почесто известуваат за насилни злосторства извршени од странци

Веста за нивната интервенција брзо се прошири низ цела Германија. Во овој поглед, многумина посочија на долгогодишните напори на крајно десничарската, антиимигрантска партија Алтернатива за Германија (AfD) да ја поврзе миграцијата со криминалот, и покрај неодамнешната студија на Институтот Ифо со седиште во Минхен која не покажува „никаква врска“ помеѓу имиграцијата и зголемувањето на стапките на криминал.

Се чини дека многу германски медиуми ја нагласуваат оваа врска. Според анализа од 2023 година, која неодамна ја објави Дојче Веле, печатените и телевизиските медиуми имаат пет пати поголема веројатност да пријават насилни злосторства кога осомничениот е странец.

„Во таква средина, потребно е да се раскаже приказната за Мухамед, по потекло од околината на Алепо, кој пристигнал во Германија како бегалец во 2022 година“, напиша новинарката и политичка коментаторка Гилда Сахеби за „Ди Тагесцајтунг“.

„Јавната дебата денес е отруена од расистичка реторика“