Сирија побара помош од Европската унија
ДВА ДЕНА по разорниот земјотрес што ги погоди Сирија и соседна Турција, Сирија побара помош од Европската унија, потврди Европската комисија. „Утрово добивме барање од сириската влада за помош преку механизмот за цивилна заштита“, изјави европскиот комесар за управување со кризи Јанез Ленарчич.
Ги охрабруваме земјите-членки да придонесат за бараната помош, додаде Ленарчич. Земјите можат да побараат помош преку Механизмот за цивилна заштита на ЕУ кога обемот на катастрофата го надминува капацитетот на засегнатата земја да се справи со вонредната состојба.
Откако ќе се активира механизмот, Координативниот центар за одговор при итни случаи на ЕУ ја координира и финансира помошта обезбедена од земјите-членки и осумте дополнителни земји кои учествуваат во ERCC.
ERCC е оперативен центар на Механизмот за цивилна заштита. Центарот постојано ги следи светските настани и ги координира напорите на ЕУ за одговор при катастрофи. Операциите за цивилна заштита се поддржани и со сателитски карти кои се произведени како дел од услугите за управување со кризи Коперник.
Еден ден претходно, сирискиот Црвен крст ја повика Европската унија да ги укине санкциите против Дамаск. Сирија, на чело со претседателот Башар ал Асад, е под меѓународни санкции од почетокот на војната во 2011 година, што значително ја намали трговијата со остатокот од светот.
Дамаск посочува дека економската криза во земјата е директна последица на меѓународните санкции. Тие мерки против Дамаск беа воведени по задушувањето на продемократските протести, само за земјата да потоне во граѓанска војна што ја опустоши.
Граѓанската војна која трае повеќе од единаесет години во голема мера го исцрпи капацитетот на земјата сама да се справи со таква природна катастрофа. Сириската армија продолжува да се судри со различни бунтовнички групи, вклучително и терористички организации како Ал Нусра и Исламска држава, со помал интензитет.
