Синот на пратеничката Коџаџику се вработи во М-НАВ
Премтим Коџаџику, синот на пратеничката од ВЛЕН и членка на Демократското движење, Мерита Коџаџику, е вработен како „независен советник во кабинетот на директорот за финансии, правни работи и развој“ во агенцијата за контрола на летање М-НАВ, јавува весникот Коха.
Извори од М-НАВ за весникот велат дека тој е еден од само двајцата Албанци вработени на последните два конкурса, на кои се примени вкупно 16 лица. Првиот конкурс (13 јуни) завршил без вработен ниту еден Албанец, додека на вториот (9 јули), освен Премтим Коџаџику, е ангажиран и Артан Шаќири на позицијата „осигурување на имот“.
Официјалните одлуки ќе се соопштат по завршување на изборите.
Во меѓувреме, Синдикатот на контролори на летање го обвини раководството на М-НАВ дека не дозволува нивен претставник да учествува на интервјуата со кандидатите за работни места со почетна плата над 1.000 евра, спротивно на Колективниот договор.
„Ние не сме шпиони за да гледаме низ клучалка, туку да потврдиме дека се избрани најдобрите кандидати“, изјави Александар Тасевски, претседател на синдикатот, додавајќи дека директорите си оставиле ексклузивно право за селекција, без реална контрола или транспарентност.
Синдикатот инсистира на повторување на постапките со вистинска вклученост на нивни претставници, а обвинувањата за политички вработувања продолжуваат да ја тресат агенцијата.
