Синдикатот на професионални војници алармира за лоши услови во касарните по појавата на шуга во Велес
По информацијата дека кај двајца новопримени професионални војници во велешката касарна „Алексо Демниевски – Бауман“ е констатирана шуга, со реакција излезе Независниот синдикат на професионални војници, кој обвини за, како што наведуваат, сериозно нарушени услови за живот и работа во воените објекти низ државата.
Од синдикатот посочуваат дека случајот во Велес не е изолиран, туку дека слични ситуации се случувале и претходно, но не добиле јавност и медиумско внимание.
Во соопштението се наведува дека професионалните војници се соочуваат со несоодветни услови за сместување, вклучително и стара и необновена постелнина, перници и ќебиња, како и простории со влага и појава на инсекти. Се посочува и на, според нив, нехигиенски услови при сервирање на храната, стар прибор и недоволен квалитет и разновидност на оброците, како и нереновирани санитарни јазли. Дополнително, тврдат дека во одредени објекти има проблеми со струја и техничка вода, што, според нив, трае со години.
Претседателот на синдикатот, Александар Насковски, наведува дека военото раководство и досегашните министри за одбрана не покажале доволна грижа за условите во кои престојуваат професионалните војници. Според него, се инвестира во реновирање на простории за офицери, додека објектите каде што престојуваат војниците остануваат во лоша состојба.
Од синдикатот сметаат дека со зголемувањето на буџетот за одбраната, во согласност со барањата на НАТО, приоритет треба да биде подобрување на условите за работа и грижа за човечкиот фактор, а не само набавка на опрема.
Во реакцијата се упатуваат и критики до министерот за одбрана Владо Мисајловски, со обвинувања за изостанат социјален дијалог и игнорирање на барањата на војниците. Како дополнителни проблеми ги наведуваат отсуството на покачување на платите во изминатите три години поради правни измени, појава на дискриминација и мобинг, како и одлив на кадар.
Синдикатот најавува дека ќе продолжи јавно да информира за состојбите во Армијата.
Претходно, од АРМ и Министерството за одбрана соопштија дека двајца професионални војници од касарната во Велес се заразени со шуга и дека станува збор за дел од 296-те нови војници кои положија заклетва на 16 јануари.
