Симов: Убеден сум дека со Македонија ЃП ќе го освојам Купот и како тренер!
Симов во Македонија ЃП дојде во 2005 година и се задржа три сезони до 2008 година, по што замина во Силекс, па играше за Вардар, албански Билис, па се врати во Силекс, каде во 2019 година ја почна тренерската кариера и веќе како стратег има еден куп-трофеј со кратовци во 2021 година. После неуспешната епизода лани со Вардар, сега Македонија ЃП му е трет клуб во кариерата и го наследува Муарем Бајрами, кој беше кормилар претходните 18 месеци.
„Дојдов во добро позната средина, мојот прв клуб во Македонија беше Македонија ЃП и како голман бев член на генерацијата која го донесе првиот куп-трофеј во Ѓорче Петров. Тука сум зашто верувам во овие играчи и убеден сум дека и како тренер со Македонија ЃП ќе го освојам куп-трофејот“, рече Симов.
Македонија ЃП утре го чека ривалот за полуфиналето од Шкендија, Струга ТЛ и Силекс во разврската низ еден меч преку која треба да се добијат финалистите за годинешната битка за пехарот.
