Силјановска-Давкова: Независните листи мора да останат дел од изборниот процес
Претседателката Гордана Силјановска-Давкова изјави дека актуелната состојба со изборниот законик создава правен вакуум по укинувањето на членови 17 и 18 од Уставниот суд, и предупреди дека измените на законот мора да се носат со широк политички консензус и во согласност со меѓународните стандарди.
„Изборниот законик е неверојатно важен правен акт. Сега се вели дека треба да се оди по консензус – мислам и на власта и на опозицијата. Точно е дека постои некаков договор околу новите решенија, но заради двојното мнозинство тие сѐ уште не се изгласани,“ рече Силјановска-Давкова.
Таа потсети дека членот 60 од законикот, кој овозможува независни листи за локалните избори, не е укинат, што значи дека граѓаните повторно ќе можат да предлагаат кандидати без партиска поддршка.
Силјановска-Давкова подвлече дека Уставниот суд укажал на сериозни недостатоци во скратената постапка за донесување на законот и дека идните решенија мора да ги почитуваат препораките на меѓународните организации.
„Уставниот суд укажува на важни меѓународни акти – хелсиншкиот документ, правилата на ОПСЕ и кодексот на добри изборни практики на Венецијанската комисија. Тие велат дека услови може да се поставуваат, но тие не смеат да бидат дискриминаторски,“ додаде таа.
Претседателката ја нагласи потребата од намалување на бројот на потребни потписи за независни листи, особено во малите општини каде сегашните услови создаваат нееднаквост. „Венецијанската комисија вели дека најмногу 1% од избирачите треба да се бараат како потпис. Колку е помала општината, толку повеќе се надминува овој процент,“ нагласи таа.
Во изјавата, Силјановска-Давкова истакна дека е потребно усогласување со европските стандарди за да се поттикне граѓанската вклученост во локалната демократија и да се избегне нова уставносудска интервенција.
