Сиљановска до Спиропали: Македонскиот пат кон ЕУ стана „исцрпувачки маратон“ – билатерализацијата е опасен преседан
„По 20 години кандидатски статус, македонскиот пристапен процес стана исцрпувачки маратон со постојано одложување на целта“. Оваа порака ја испрати претседателката Гордана Сиљановска-Давкова на денешната средба со албанската министерка за Европа и надворешни работи, Елиса Спиропали, која престојува во официјална посета на Скопје.
На средбата, која помина во знакот на добрососедските односи и заедничката европска иднина, двајцата соговорници заклучија дека регионот како целина треба да се интегрира во Европската Унија без натамошно одложување.
Сиљановска-Давкова го поздрави напредокот на Албанија во преговорите, истакнувајќи дека успехот на секој сосед е добар за целиот регион. Сепак таа беше децидна во ставот дека процесот мора да се базира на реални критериуми.
Албанската министерка Спиропали изрази силна поддршка за македонските евроинтеграции, нагласувајќи дека Западниот Балкан дели исти вредности и треба заеднички да чекори кон европското семејство.
Освен високата политика, тема на разговор беа и конкретните инфраструктурни проекти кои ги поврзуваат двете земји. Посебен акцент беше ставен на Коридорот 8, при што беше поздравена јасно дефинираната временска рамка во трилатералниот меморандум меѓу Македонија, Албанија и Бугарија.
За да се олесни комуникацијата меѓу граѓаните и бизнисот, договорено е да се забрза воведувањето на системот „One Stop Shop“ (едно застанување) на сите гранични премини, што ќе овозможи брза заедничка контрола.
Соговорничките се согласија дека правата на малцинските заедници се мост за поврзување и додадена вредност во одличните македонско-албански односи, кои продолжуваат и преку сојузништвото во НАТО.
