Сиљановска-Давкова на 30-годишнината од Четвртата светска конференција за жените во Њујорк: Жените заедно со децата, се првите и најголемите жртви на војните!
Претседателката на Република Северна Македонија, Гордана Сиљановска-Давкова, се обрати на состанокот на високо ниво по повод 30-годишнината од Четвртата светска конференција за жените, во рамки на 80. Генерално собрание на Обединетите нации во Њујорк.
Во своето обраќање, претседателката нагласи дека жените, заедно со децата, се првите и најголемите жртви на војните, но истовремено и носители на исцелување, сочувство и надеж.
„Пекиншката декларација и Платформата за акција остануваат камен-темелник на меѓународното право. Родова еднаквост не е феминистичка привилегија, туку хуманистички императив“, рече Сиљановска-Давкова, истакнувајќи дека напредокот во последните три децении е нееднаков, кревок и често реверзибилен.
Претседателката посочи дека насилството врз жените продолжува да биде проблем, фемицидот ја загрозува човечката вредност, а структурните бариери го ограничуваат лидерството и учеството на жените во одлучувањето.
„Ако сме сериозни во врска со мирот, време е да го довериме кормилото на Обединетите нации на жена“, додаде таа, нагласувајќи дека родовата еднаквост е предуслов за праведни и просперитетни општества.
Учесниците на состанокот го потенцираа значењето на конкретни и одржливи политики, како и забрзување на имплементацијата на Пекиншката декларација и Платформата за акција, како основа за зајакнување на сите жени и девојчиња ширум светот.
