ШВЕДСКА ЛИДЕР ВО ЕНЕРГИЈА ОД ОБНОВЛИВИ ИЗВОРИ: Европа „каска“ со плановите, кај нас драстичен скок по поскапувањето на струјата

Европска унија повторно забележа раст на
производството и потрошувачката на енергија добиена од обновливи извори. Како
што соопшти европскиот статистички центар, дури 23 проценти од потрошената
енергија во 2022 година доаѓа од обновливи извори.

– 
Учеството на обновливите извори во бруто
потрошувачката на финална енергија на ниво на ЕУ достигна 23 отсто во 2022
година. Во споредба со 2021 година, ова претставува зголемување од 1,1
процентен поен (п.п.). Ревидираната Директива за обновлива енергија предвидува ЕУ да троши енергија од обновлива енергија до 2030 година од 32 до 42,5 отсто (со намера да се зголеми на 45 проценти) – се истакнува во анализата
на „Евростат“.

Притоа додаваат дека поради новите цели за
поголемо произодство на енергија од ОИ, земјите на ЕУ треба да ги интензивираат
своите напори за колективно усогласување со новата цел на ЕУ за 2030 година,
која бара зголемување на уделот на ОИЕ во бруто
потрошувачката на финална енергија на ЕУ за речиси 20 п.п.

– 
Шведска води меѓу земјите на ЕУ, со речиси
две третини или 66 проценти од нејзината бруто потрошувачка на финална енергија
во 2022 година е добиена од обновливи извори. Шведска се потпираше на хидро, ветер, цврсти и течни биогорива, како и топлински пумпи. Следува
Финска со 47,9 отсто, земја која исто така се потпира на хидро, ветер и цврсти
биогорива. Потоа следува Летонија чија потрошувачка од ОИ достигнува 43,3
проценти, а најмногу ја добива од хидроцентралите. И Данска  со своите 41,6 отсто се котира високо, по што
следи Естонија со 38,5 проценти, и двете најголем дел од енергијата од обновливи
извори на енергија ја добија од ветер и цврсти биогорива. Португалија пак имаше
34,7 отсто енергија од ОИ кои ги доби од цврсти биогорива, ветер, хидро и
топлински пумпи, додека Австрија која потроши 33,8 отсто енергија од ОИ
користеше најмногу хидро и цврсти биогорива – прецизира „Евростат“ во
анализата.

Наспроти земјите со најголемо производство и
потрошувачка на енергија од обновливи извори се земјите кои имаат најмало
учество, а тоа се Ирска со само 13,1 отсто енергија од ОИ, па Малта со 13,4
проценти, Белгија со 13,8 отсто и Луксембург 14,4 проценти.

Воедно „Евростат“ констатира дека дури 17 од
27-те членки на ЕУ имаат постигнато во своите активности под поставениот просек
на ЕУ од 23 отсто од потрошената енергија да биде од обновливи извори.

Македонија на патот на искористување на
предностите од обновиливите избори значително забрза последниве две години,
особено по енормниот раст на цените на енергијата на светските берзи минатата
година, што особено ја почуствуваа компаниите.

По драстичното поскапување, значително се зголемија
барањата за производство на енергија од ОИ. Како што неодамна информираа од
Регулаторната комисија за енергетика, за само 22
месеци инсталирани се нови енергетски капацитети со вкупна инсталирана моќност
од 523,2 мегавати (МW) кои ќе произведуваат електрична енергија од обновливи
извори.

– 
За десет месеци имаме нови инвестиции во енергетика што
произведуваат електрична енергија од Сонце за кои се издадени лиценци со вкупна
инсталирана моќност од 371 MW, што е за 140  проценти повеќе од цела 2022
година – кога вкупниот инсталиран капацитет достигна до 152,2 MW. Интензитетот
на реализација на енергетските капацитети е зголемен и евидентен ако се направи
паралела со пред пет години кога имаме издадено лиценци за скоро 6 MW –
соопштија неодамна од РКЕ. Според Регулаторна со електричната енергија
произведена од обновливи извори од новите централи, што се изградени за помалку
од две години може да снабдуваат над 166 илјади домаќинства.

П.О.