Шукова кон Георгиевски: Или манипулирате или сте целосно некомпетентен, парк во Вардариште е опасна фантазија
Кандидатката за градоначалник на Скопје од редовите на СДСМ, Каја Шукова, денеска остро го нападна нејзиниот противкандидат од ВМРО-ДПМНЕ, Орце Георгиевски, оценувајќи го неговото ветување за изградба на парк на локацијата Вардариште како „изборна измама“ и доказ за негова „целосна некомпетентност или свесна манипулација“.
Според Шукова, ветувањето за парк на најзагадената точка во главниот град е не само неостварливо, туку и опасно, игнорирајќи ги огромните еколошки, правни и технички пречки.
„Во Вардариште има над 2 милиони кубни метри отпад, одлаган без никаква подлога. Тоа е локација со висок ризик по здравјето и животната средина“, изјави Шукова, нагласувајќи дека само процесот на санација и деконтаминација на земјиштето би траел со години пред воопшто да се размислува за негова пренамена.
Таа посочи и на сериозна правна пречка која оневозможува каква било интервенција на теренот.
„Во моментов тече арбитражна постапка во Париз поврзана со проектот ‘Скопски колектор’, кој поминува токму низ Вардариште. До завршување на таа постапка, ниту смее ниту може да се менува намената на тој простор“, предупреди Шукова.
Кандидатката на СДСМ потсети дека за оваа локација веќе постои единствен легитимен и стручен план, изработен уште во 2017 година со поддршка од Европската Унија.
„Деталната техничка документација јасно предвидува Вардариште да биде локација за современа претоварна станица за отпад. Тоа е единствениот стручен и легитимен план и јас стојам зад тој план“, изјави таа, додавајќи дека во тек е и јавна набавка за поддршка на целиот регионален систем за управување со отпад, што го прави секој обид за политичка интервенција штетен и спротивен на нормите.
Шукова го обвини Георгиевски дека наместо решенија, нуди неосновани фантазии и го поврза со претходната градска власт на ВМРО-ДПМНЕ и Данела Арсовска, која, според неа, го оставила Вардариште „да гори и да труе“.
„Скопјани веќе еднаш беа излажани со 150 автобуси, мега паркови и слични бајки. Време е за сериозен, стручен и државнички пристап“, заклучи кандидатката за градоначалничка на Скопје од СДСМ.
