Шуга во Куманово, епидемиолозите велат нема простор за паника!
Во Куманово е потврден еден случај на шуга кај ученик од ОУ „Кирил и Методиј“ во село Романовце, соопштија од Центарот за јавно здравје. Според здравствените власти, нема простор за паника, бидејќи во училиштето се преземени сите мерки за дезинфекција.
Епидемиолозите извршија увид на терен и препорачаа изолација и третман на заразениот ученик, како и превентивни мерки за неговото семејство. Просториите на училиштето се дезинфицирани, а доставени се и дополнителни средства за хигиена.
Според Институтот за јавно здравје, минатата година биле регистрирани 493 случаи на шуга, што е значителен пораст во однос на 2023 година, кога имало 337 заболени. Најмногу случаи имало во Скопје, Куманово и Гостивар.
Шугата предизвикува силно чешање, особено ноќе, и кожни промени, најчесто меѓу прстите, на стапалата и стомакот. Болеста се пренесува преку директен контакт, па лекарите препорачуваат редовно одржување на хигиената, перење на облеката на висока температура и избегнување близок контакт со заразени лица.
Лекувањето вклучува специјални кремови или орална терапија. За целосно елиминирање на паразитот, важно е сите членови на семејството да бидат третирани истовремено.
Институтот за јавно здравје апелира на внимателност, но и на смиреност – со правилна превенција и третман, ширењето на шугата може да се стави под контрола.
