Шуга во касарната „Алексо Демниевски-Бауман“ – заразени двајца професионални војници
Двајца професионални војници од велешката касарна „Алексо Демниевски-Бауман“ се потврдени како заразени со шуга, соопштија од Министерството за одбрана и Армијата на Република Македонија (АРМ). Заразените се дел од новата класа од 296 професионални војници кои на 16 јануари положија заклетва.
Стручните лица на АРМ и Воено-медицинскиот центар веднаш презеле мерки согласно здравствените протоколи за спречување на евентуално ширење на заболувањето. Во касарната бил извршен епидемиолошки надзор, а сместувањето на војниците е организирано согласно армиските стандарди со обезбедена дезинфекција, чисти постелнини и контролиран план за капење.
„Сместувањето на војниците е регулирано согласно правилото за сместување и ред во Армијата. Пред почетокот на обуката се обезбедени соодветни услови за сместување, престој и работа, во согласност со армиските стандарди“, стои во заедничкото соопштение на Министерството за одбрана и АРМ.
Министерството и АРМ потсетуваат дека претходно во велешката касарна биле реализирани прием и сместување на повеќе класи нови војници, како и најголемата ситуациска вежба „Seven Stars 2025“ со над 150 домашни и странски учесници, без појава на шуга.
Шугата е инфективно паразитарно заболување со карактеристични кожни промени и силен јадеж, а периодот на инкубација според Институтот за јавно здравје е четири недели. По положувањето на заклетвата, сите 296 нови војници беа дома до 19 јануари, а заразените лица во моментов се во домашна изолација.
Во велешката касарна претходно шугата се појавила во ноември 2019 година, кога бил забележан само еден случај. Според Институтот за јавно здравје, во 2024 година регистрирани се 493 заболени лица, а во 2023 – 337.
