Што работел Коце Трајановски изминатите години пред да стане директор на „Државни патишта“?
Поранешниот градоначалник на Град Скопје и Општина Гази баба, Коце Трајановски, според засега медиумски информации, е назначен од Управниот одбор на „Државни патишта“ за нов директор на ова јавно претпријатие на местото на Ејуп Рустеми. Во меѓувреме бил управител на фирма што практично не остварувала никакви приходи.
Последната државна функција која ја извршувал му беше онаа како скопски градоначалник до крајот на 2017. Според она што го проверивме во „Централниот регистар“, на негово име фигурира само една фирма на која Трајановски станал косопственик во 2018, годината по поразот на локалните избори.
Поранешниот пратеник станал косопственик на „Косистеми Доо“ во јуни 2018, а претходно оваа фирма за „производство на земјоделски производи, трговија и услуги“ е регистрирана во 2014.
Трајановски е управител на ова претпријатие, во кое останатиот косопственик е неговата сопруга Душанка Трајановска.Во фирмата варирале промени во дејноста од „одгледување на останати повеќегодишни посеви“ до „изградба на станбени и нестанбени згради“.
Претходното име на „Косистеми“ било „Природна органска храна“, а според претходен медиусмки извештај, ова претпријатие поседувало три градежни парцели во скопска Керамидница. Во 2023 нема остварени приходи, а има трошоци од 7.500 евра. Нема ниту податок за број на вработени.
Трајановски како раководител на Јавното претпријатие за државни патишта ќе има неколку сериозни предизвици со кои ќе треба да се справува, како изградбата на автопатите Кичево – Охрид и Скопје – Блаце, а тука е и проектот со „Бехтел и Енка“ за автопатските делници од Коридорот 8 и Коридорот 10Д. ЈПДП лани оствари добивка од безмалку 100 милиони евра, но прашање е колку е таа реална, бидејќи од државниот буџет беа префрлени околу 240 милиони евра за конзорциумот „Бехтел и Енка“, а непознато е колку од овие пари се реализирани.
Трајановски ретко се појавува во јавност, но во последно време издвојуваше биографски белешки за тоа дека бил 16 години програмер во МЗТ, а потоа отворил фирма за софтвер која ја затворил пред да стане пратеник.
А.К.
