„ШТО Е МОЕ, ШТО ЌЕ НОСАМ ЈАС НА ДРУГИОТ СВЕТ?: Во поткастот „Бизнис муабети“ Огнен Оровчанец открива кој го наследува и каков став има кон богатството
За тоа како се успева, дали е лесно и колку се заработува, може да погледнете во најновиот поткаст „Бизнис муабети“ на Фактор со Огнен Оровчанец, сопственик на Агроунија, компанија за семенски производи и ѓубрива. На пазарот егзистираат 35 години.
Оровчанец е дел од оние македонски бизнисмени кои ги плетат успешните бизнис приказни во Македонија.
Компанијата е формирана во 1989 година, а годинава одбележува јубијелни 35 години постоење.
Оровчанец вели дека во земјоделството во Македонија се врат десетици па и стотици илјади евра, а за неговата компанија вели дека е сериозна.
„За 35 години не сум се обогатил лично, но фирмата е сериозна. Имаме магацин од 2.500 квадрати, дирекција, продавници, возен парк“, вели тој.
Дополнително тој вели дека добри пари се вртат од продажба на семиња и ѓубрива, но потенцира дека 40 проценти од пазарот припаѓа на сивата економија.
На прашањето колку може да се заработи од земјоделство, Оровчанец вели дека само ѕвездите се лимит.
Вели тешко е да се најдат работници, бидејќи младите не сакаат да работат и покрај тоа што им нудат плата близу илјада евра, поточно 50 илјади денари.
Сега вели ќерка му е таа што полека го презема бизнисот, тој, иако е во пензија, согласно сите законски прописи е управител и вели, понекогаш „си тера мајтап, некогаш се нервира или ги нервира, но тоа е животот“.
Вели дека нема луѓе за работа. Нема млади кои сакаат да работат.
„Бараме тракторсти не можеме да најдеме и за 50 илјади денари плата. Овчари одамна нема дури и за 1000 и повеќе евра плата“, вели тој.
Вели дека кај нас уште е срамота да се каже дали некој е богат или не, а богатството е релативно. Вели дека 90 проценти од работите што ги има, се во сопственост на фирмата.
„Што е мое, што ќе носам јас на другиот свет?“ вели тој.
Оровчанец за себе вели дека не е среброљубец, кога би бил сигурно би направил повеќе од тоа што го има денес, но, не би бил задоволен.
Има куќа од татко му која тој ја реновирал и апартман на страна.
„Јас сум задоволен од тоа што сум го направил. Од ништо сме направиле фирма од која што живееле, работеле, 30,40 па и 50 луѓе“, вели тој.
На прашањето дали е скржав, и дали им дава пари на децата за излегување, тој вели дека неговите деца се нормално воспитани, односно, знаат дека парите имаат вредност, дека треба напорно да се работи, а задоволството неговите деца треба да го најдат на друго место.
