Што договорија Вучиќ и Курти во Брисел?
Белград и Приштина усвоија Декларација за исчезнати лица, a се разговара за формирање на Заедницата на српски општини (ЗСО).
Во Брисел почна нова рунда дијалог меѓу Белград и Приштина со посредство на ЕУ, а на неа присуствуваат претседателот на Србија, Александар Вучиќ и косовскиот премиер Албин Курти, во присуство на високиот претставник на ЕУ за надворешна политика и безбедност, Жосеп Борел и специјалниот пратеник на ЕУ за дијалог, Мирослав Лајчак.
„На крајот треба да имаме статут кој е прифатлив за двете страни, и за Косово и за Србија, во согласност со европските стандарди. Тоа е првиот важен чекор“, изјави Лајчак за хрватската новинска агенција Хина.
Тој посочи дека ова е првпат да се види работата на Управувачкиот тим, кој го сочинуваат четири лица стационирани на Косово, кои беа формално ангажирани од косовската владата, но беа предложени од општините со мнозинско српско население.
Тој повтори дека ЕУ не сака да создаде ЗСО врз основа на модел кој досега не бил тестиран во светот, туку врз основа на некои од постоечките европски модели.
Вучиќ претходно се пожали дека големи сили од Западот се на страната на Косово.
Косовската претседателка Вјоса Османи денеска изјави дека Косово треба да го претстави својот нацрт Статут на Заедницата на српските општини, изготвен во согласност со Уставот на Косово, одлуката на Уставниот суд од 2015 година и писмениот став на САД, пренесува „Дукаџини“.
Османи изјави дека овој нацрт на Статутот на ЗСО треба да биде основа за преговори.
Фото: BETAPHOTO / Sipa Press / Profimedia
