ШТО ЈА „НАГРИЗА“ ЧОКОЛАДНАТА ДОБИВКА ВО ПРВИОТ КВАРТАЛ – еве кои се причините за намалениот профит на „Европа“

Намалена добивка за близу две третини во однос на истиот период лани. 

Чоколадната фабрика „Европа“ го објави финансискиот извештај за првиот квартал од годинава, кој покажува дека во првите три месеци тоа акционерско друштво остварило нето добивка од над 101 илјади евра, што е намалување за цели 68 отсто во однос на истиот период од минатата година. Имено, во првото тримесечје лани добивката на „Европа“ изнесувала 322 илјади евра. 

Во периодот 01.01-31.03.2023 година компанијата остварила вкупни бруто приходи на износ од 208.470.846 денари, кои се зголемени за 1,5 отсто во однос на  бруто приходите од 2022 година за истиот период.

Вкупните оперативни приходи за првиот квартал се зголемени за 4,1 отсто во однос на 2022 година. Останатите приходи се зголемени за 9,8 проценти, а кај финансиските приходи зголемувањето
е 321,7 отсто во однос на 2022 година.

Вкупните расходите се зголемени за 9,9 отсто во односна минатата година.Оперативните
расходи во периодот 01.01-31.03.2023 година се зголемени за 9,8 проценти, а финансиските расходи се зголемени за 60,1  отсто во однос на 2022
година.

Во своето образложение на финансискиот резултат за првиот квартал од годинава од „Европа“ нагласуваат дека нивната добивка е намалена за 68,5 проценти, а како причини ги наведуваат енормното зголемување на цените на енергенсите, суровините и амбалажата, но и неопходното зголемување на платите, што го донеле измените на Законот за минимална плата, како и зголемената инфлација во земјава. 

„Намалувањето на добивката
за првиот квартал од 2023 година се должи на енормното зголемување на цените на
енергенсите, суровините и амбалажата, како главни производни инпути и
потешкотиите за нивно следење, со цел да се постигне конкуретна цена на нашите
производи на пазарот. Тие имаа директно влијание на 

количинскиот пад на продажбата за 13,6 отсто, поради намалените нарачки
од нашите купувачи,а тоа пак негативно се одрази и на падот на производството
за 12,6 проценти“, објаснуваат од компанијата во своето образложение на финансискиот резултат. 

Растот на инфлацијата, како што дополнуваат, наметнал потреба од зголемување и на бруто
платите за вработените за 15 отсто, кои исто така имаат влијание на порастот на
вкупните оперативни расходи. 

Од компанијта додаваат и дека новите законски измени за минималната плата, со
примена од 01.03.2023 година, исто така дополнително го зголемиле трошокот за
бруто плата.

„И покрај сите турбулентни потешкотии во изминатиот период, АД Европа со успешно менаџирање со продажбата, преку зголемување на
продажните цени и намалување на останатите индиректни трошоци, успеа да се одржи
на пазарот и да оствари позитивен финансиски резултат, но со осeтно намалување од 68,5 отсто во однос на истиот период од 2022 година“, се вели во образложението од компанијата.

Н.Н.Ф.