Штип и Струмица ја започнаа 2026 со женски бебиња – малиот Герасим е првата радост за Прилеп
Додека празничниот огномет го најавуваше доаѓањето на 2026 година, македонските градови ги пречекаа своите први жители. Со многу радост, желби за здравје и традиционални посети од локалните власти, првиот ден од годината помина во знакот на новиот живот.
Во Клиничката болница во Штип, првото новороденче е Петра, родена точно во моментот кога стрелките се поклопија на полноќ. Таа е прва рожба на 40-годишната Марија Јанкова-Петрова.
Бебето е тешко 3.550 грама и долго 50 сантиметри.
Градоначалникот Иван Јорданов и директорот Владко Захариев ја посетија мајката, посакувајќи бериќетна година. Јорданов ја посети и приватната болница „Д-р Органџиски“, каде првото бебе во новата година е машко.
Во Струмица, првото бебе во 2026 година пристигна во 07:20 часот наутро. Се работи за женско бебе, трето дете во семејството на мајката Катерина Тодорова, која и самата е докторка по професија. Новороденчето е со тежина од 3.950 грама и должина од 52 сантиметри.
Прилеп ја започна годината со машко бебе. Малиот Герасим се роди во 02:23 часот по полноќ како второ дете во семејството на Софија Никоска Маџароска. До пладне на 1 јануари, во прилепската болница се родиле вкупно три дечиња. Градоначалникот Дејан Проданоски го посети семејството, нагласувајќи дека децата се најголемата иднина на општината.
