Шестмина од групата на Шеваљ Муареми осудени за убиства и трговија со дрога – водачот во бегство

Додека водачот на криминалната група, Шеваљ Муареми, и понатаму е недостапен за органите на прогонот, Кривичниот суд во Скопје донесе пресуда против шестмина припадници на неговата група. Тие се прогласени за виновни за тешки кривични дела – организирање злосторничко здружување, двојно убиство и трговија со дрога.

Најтешките казни ги добија Фати Сулејмановски и Шулајб Сулејмановски – 14 години и 6 месеци, односно 15 години затвор, за учество во двојно убиство и делување во организирана криминална група, позната како „Дуќанџик/Грчец“.

Четворица други припадници на групата добија затворски казни од по пет и шест години за трговија со кокаин. Според обвинението, тие во текот на 2020 година, под водство на Шеваљ Муареми и убиениот Орхан Бајрами – Оки, учествувале во набавка, транспорт и продажба на најмалку 15 килограми кокаин на територија на Македонија.

Двајца од осудените се гонети и за двојното убиство во скопската населба Топанско Поле, во кое животот го загубија Африм Бериша и Бурим Вардари. Обвинителството тврди дека убиството било извршено како одмазда, бидејќи Бериша претходно наводно го организирал нападот во хотелот „Александар Палас“, во кој биле цел групата на Муареми.

Групата брои околу 15 членови – дел од нив се во бегство, а други, вклучително и водачот, се сѐ уште недостапни за органите на прогонот. Истражните органи продолжуваат со активности за пронаоѓање на останатите инволвирани.