ШЕНГЕН ЈА БЛОКИРАШЕ БУГАРИЈА: Хаос на граничниот премин Градина, од Србија се чека 20 часа, транспортерите се нервозни, властите ги засилуваат контролите

Последните неколку дена на автопатот на источниот крак од Коридорот 10 има километарски колони камиони. Поради зголемената контрола на бугарската царина, на граничниот премин Градина луѓето чекаат и до 20 часа за излез од Србија, или за влез во соседна Бугарија.

Редот на камиони на преминот Градина утринава е долг 10 километри, а излезот од Србија се чека речиси 24 часа, пишува српски Курир.

Најголем дел од камионите се со бугарски и турски регистарски таблички. Возачите се нервозни и незадоволни поради долгото чекање, особено во деновите кога утринските температури се екстремно ниски.

– Нормално, на овој премин има гужви, но ова е надвор од секоја граница. Беше минус 11 степени, но имаме вебасто систем, па се загреваме, но не е лесно. Сегашната ситуација е навистина лоша, но има решение. Неопходно е државата да биде малку поактивна околу тоа – вели еден возач.

Возачите известуваат дека големи редици има и на другите премини, поточно кај Батровци, а потоа и во Турција.

– Во последно време стана нормално. Стана нормално дека испаѓаме на границите. Што да смениме, само блокадите. Мислам дека Бугарите сега прават проблем, но не знам што е во прашање – додава возачот кој од Загреб замина за Бурса.

Неофицијално се дознава дека царината на Србија работи вообичаено и дека побавната контрола на бугарската царина е главната причина за големиот метеж.

Во меѓувреме, бугарската царина соопшти дека поради подготовката за влез на Бугарија во Шенген зоната, зголемени се проверките на сите премини. Контролите ќе останат во сила додека Бугарија целосно не пристапи кон Шенген, се вели во соопштението.

Сообраќајната полиција ги запира камионите на наплатната рампа Димитровград, за да нема гужви во тунелите и да не биде загрозена безбедноста на патниците во автомобилите и автобусите.

Курир.рс