ШЕФОТ НА ЈАКУЗА УАПСЕН ВО ФИЛМСКА ТАЈНА АКЦИЈА „Застрашувачки е да се замислат последиците за светот доколку неговата операција беше успешна!
Властите на САД покренаа обвинение против Такеши Ебисава (60), јапонски државјанин и наводен шеф на Јакуза, за заговор кој вклучувал шверц на нуклеарни материјали во Иран.
Ебисава, заедно со Сомфоп Сингхасири, 61-годишен тајландски државјанин, беа обвинети, меѓу другото, и за трговија со дрога, откако нивните наводни злосторства беа откриени со тајна операција предводена од американската Администрација за борба против дрога (ДЕА).
– Тие отидоа дотаму што на Техеран му понудија ураниум и плутониум во очекување дека Иран ќе го искористи за создавање нуклеарно оружје – изјави Ен Милграм, шеф на ДЕА.
Во обвинението понатаму се наведува дека „криминалните активности на Ебисава вклучувале трговија со наркотици и оружје од големи размери“ и дека неговата меѓународна криминална мрежа се протегала во Азија, Европа и Соединетите Држави.
Што се однесува до самата акција, на почетокот на 2020 година, Ебисава наводно му рекол на таен извор на агент на ДЕА дека има пристап до „голема количина нуклеарен материјал што сака да го продаде“.
Тајниот агент се претставил како шверцер на дрога и оружје со врски со ирански генерал, а наводно се работи за „50 тони темен камен материјал“, чија вредност се проценува на 6,32 милиони евра.
„Материјалот од темен камен“, кој дошол од Мјанмар, бил запленет од тајландската влада и предаден на американските инспектори. Во лабораторија во САД беше потврдено дека материјалот содржи ураниум и плутониум.
– Страшно е да се замислат последиците по светот доколку нивната операција биде успешна. Американското Министерство за правда ќе ги смета за одговорни сите оние кои ги продаваат овие материјали и ја загрозуваат националната безбедност и меѓународната стабилност на САД – најавија американски официјални лица.
Ебисава е обвинет и за купување воено оружје во име на вооружена бунтовничка група во Мјанмар.
