Шаќири: Образованието е важен сегмент за надминување на етничките бариери, континуирано работиме на подобрување на меѓуетничката интеграција
Македонија е мултиетничко и мултикултурно општество кое цели кон меѓусебно разбирање и заедничко живеење на заедниците, едни со други а не едни покрај други. Градењето на општество со што помалку етнички бариери е сериозен предизвик, а образованието е важен сегмент за негово надминување, рече министерот за образование и наука Јетон Шаќири на презентацијата на наодите од Истражувањето за перцепциите, мислењата и ставовите за меѓуетничката интеграција и кохезија во основното и средното образование во Северна Македонија, што денес се одржа во Скопје.
Истражувањето го реализираше Институтот за општествени и хуманистички науки – Скопје, во соработка со надворешни експерти, на барање на Министерството за образование и наука, на крајот на 2022 година.
Министерот Шаќири укажа дека во воспитно-образовниот процес се вклучени бројни активности и содржини кои промовираат интеркултурализам.
„Согласно новата Концепција за основно образование, во наставните програми се инкорпорирани целите за меѓуетничка интеграција, училиштата реализираат активностите во оваа насока, Тимот за меѓуетничка интеграција во образованието им обезбедува поддршка на наставниците за вградување на целите од образованието за меѓуетничка интеграција во планирањата на наставата, училиштата водат политика на почитување на мултикултурализмот и меѓуетничката соработка, планираат и реализираат заеднички наставни и воннаставни активности со етнички хетерогени групи“, наведе министерот дел од активностите.
За да можат Министерството за образование и наука и другите институции кои работат на меѓуетничка интеграција во образованието, да вршат релевантно програмско планирање, треба да ги знаат ефектите од преземени мерки, активности, иницијативи и проекти за меѓуетничка интеграција и кохезија во основното и средното образование.
„Токму ова е целта на Истражувањето, преку наодите да видиме до каде сме, а преку препораките – каде да продолжиме“, посочи Шаќири.
Ова е второ истражување, по иницијалното од 2017 година, и е спроведено на национален примерок од ученици, наставници, родители, стручни соработници и директори на основните и средните училишта, на македонски, албански, турски, српски и на босански јазик.
Министерот изрази голема благодарност до Мисијата на ОБСЕ во Скопје, што го поддржа истражувањето како и за континуираната поддршка што трае речиси една деценија, во насока на зајакнување на социјалната кохезија и промовирање на интегрираното образование.
