Серија земјотреси во Охридско, најсилниот со јачина од 3.8 степени – почувствуван и во Струга и околината
Телеметриската сеизмолошка мрежа на Република Северна Македонија, одржувана од Сеизмолошката опсерваторија при Природно-математичкиот факултет во Скопје, утринава регистрираше серија на земјотреси со епицентар во подрачјето Пештани – Охрид – Струга, на околу 102 километри југозападно од Скопје.
Најсилниот потрес се случил во 04:34 часот со јачина од 3.8 степени според Рихтеровата скала и е почувствуван во Охрид и околината со интензитет од V степени според Европската макросеизмичка скала. Во останатите делови од југозападна Македонија, потресот бил со интензитет од III до IV степени.
Иако предизвика вознемиреност кај граѓаните, материјални штети засега не се пријавени. Надлежните институции продолжуваат со следење на ситуацијата.
