СЕМЕЈСТВАТА СЕПАК ТРЕБА ДА ИМААТ КЕШ: Централната банка на Холандија oбјасни колку пари треба да чуваат под перница
Чувајте готовина во случај да падне електронското плаќање, им порачаа на граѓаните од Централната банка на Холандија.
Семејствата треба да имаат доволно пари за да им траат најмалку три дена во случај на вонредна состојба, предупреди централната банка на Холандија.
На граѓаните им се препорачува да чуваат 70 евра по возрасен и 30 евра по дете во готово на безбедно место во случај електронските системи за плаќање да престанат да работат. Како една од причините за овој совет, банката ја наведе заканата од сајбер-напади, која се зголемува со оглед на сè понапнатата геополитичка ситуација, пишува „Политико“.
Во април, прекинот на електричната енергија во Шпанија и Португалија предизвика сериозни, но краткотрајни проблеми со системите за плаќање. Според препораката на банката, износот на готовина што луѓето треба да ја имаат дома треба да биде доволен за да се покријат „минималните основни трошоци за три дена, како што се вода, храна, лекови и превоз“.
