Села бара конкретни мерки за употребата на албанскиот јазик и оставка од министерот за правда
Лидерот на Алијансата за Албанците, Зијадин Села, оцени дека изјавата на премиерот Христијан Мицкоски за правото на полагање на правосудниот испит на албански јазик претставува признавање на, како што вели, факти што досега биле негирани или релативизирани од поединци во власта. Според него, покрај јавните ставови, неопходни се и конкретни институционални чекори.
Села посочува дека младите албански правници имаат право испитот да го полагаат на албански јазик и дека за, како што наведува, досегашното оневозможување на тоа право треба да се утврди одговорност. Тој смета дека министерот за правда треба да биде разрешен, обвинувајќи го за прекршување на законите и Уставот.
Воедно, Села повторува дека со измените на Законот за употреба на јазиците од 2018 година, албанскиот јазик е службен јазик на целата територија на државата и на централно ниво, потсетувајќи дека тие измени биле услов на Алијансата за Албанците за учество во тогашната Влада.
Од партијата оценуваат дека само изјава на премиерот не е доволна и бараат усогласување на сите закони и подзаконски акти со Законот за употреба на јазиците и соодветните уставни одредби. Во спротивно, според Села, денешните ставови на Владата би можеле да се толкуваат како политичка порака без реални промени во институционалната практика.
