Се скарале за водоводна цевка, па го убил удирајќи го со автомобил
Основното јавно обвинителство Велес донесе Наредба за спроведување истражна постапка против 25-годишен жител на селото Виничани осомничен дека завчера со умисла лишил од живот едно лице, со што сторил кривично дело убиство.
Државното јавно обвинителство соопшти дека на 19 јули настанала вербална расправија за водоводна цевка во селото меѓу таткото на осомничениот и жртвата, по што осомничениот заминал дома, го зел автомобилот „фиат панда“, сопственост на неговиот татко, и со многу голема брзина се упатил директно кон оштетениот, намерно удирајќи го со возилото.
-При ударот, оштетениот со глава удрил во ветробранското стакло на автомобилот, излетал во воздух и се закачил на жичана ограда од двор, по што паднал на земјата, здобивајќи се со многу тешки телесни повреди од кои починал на самото место, информира ЈОРСМ.
Обвинителството посочува дека надлежниот јавен обвинител до судијата на претходна постапка достави предлог за определување мерка притвор за осомниченото лице, бидејќи постојат околности кои укажуваат на опасност од бегство, можност да влијае врз сведоците на настанот, но и веројатност дека би можел да го повтори или да стори ново кривично дело.
