СЕ ПЛАШИМЕ ДА ОДИМЕ НА УЧИЛИШТЕ: Фактор меѓу учениците во Србија
Учениците од училиштата во Србија денес не беа на училиште. Наместо настава, сите се упатија кон црквите, каде, секое училиште со свој венец, им одаде почит на починатите соученици и чуварот. Се палеа свеќи, а се одржуваше и литургија во спомен на починатите.
Во некои општини, вработените во црквите дури и им даваа совети на учениците.
– Пред воопшто и да помислите да направите нешто такво, запрашајте се дали Исус Христос би го направил тоа. Размислете за последиците што би произлегле од тоа. Воопшто да не ве интересира друштвото во кое што сте и што другите мислат за вас. Бидете умни и паметни – го поучувал свештеник од една од белградските цркви.
Учениците натажени но и исплашени, а при палењето свеќи, на една ученичка и се слошило, но за среќа, брзата помош била тука веднаш да помогне.
Младите велат дека веќе се плашат за своите животи.
– Се плашам да одам на училиште. Секој ден одам со страв, бидејќи ова излезе од контрола. Не знам на кого да му прозборам, не знам како ќе изреагира. Навистина мора да се воведе ред. Тажни сме, исплашени, лути… Измешани ни се емоциите – вели Тамара Јовановиќ, од Белград.
Од возрасните со кои екипата на „Фактор“ разговараше, велат дека се разочарани заради ваквата ситуација, тажни заради неможноста да се спречи, но и лути затоа што сите колективно паднале на испитот едуцирање на младите.
– Ова е разочарувачки. Да знаеш дека млади деца крвнички би убивале е поразувачки за нас како држава. Сите потфрливме – вели пензионер кој сакаше да остане анонимен.
Во Србија е тридневна жалост, заради убиството на девет лица кои младиот Коста К. ладнокрвно ги уби во училиштето и воопшто не се покаја за тоа.
Д.Т.
