Се одложува стартот на авиолинијата Скопје–Дубаи

Се одложува авиолинијата Скопје – Дубаи што беше најавена за 30 март. Авиокомпанијата „Флај Дубаи“ доставила барање до Министерството за транспорт и врски за пролонгирање на линијата, која беше една од субвенционираните, пренесува СДК.МК

„Во информацијата доставена до Министерството за транспорт се вели дека поради објективни причини кои не зависат од авиокомпанијата „ФлајДубаи“ формално се бара пролонгирање на започнување на операција на линијата. Воедно, се вели дека „ФлајДубаи“ е целосно посветена на воспоставување на оваа дестинација. Министерството за транспорт останува во континуирана комуникација со авиокомпанијата и целосно ги подржуваме нивните напори за реализација на оваа дестинација“, велат од Министерството за транспорт и врски.

Не е познато кога ќе почне да функционира оваа најавена авиолинија.

На првиот повик на Владата за субвенционирање на авиолинии во октомври 2024 беа избрани шест авиолинии на „Визер“, „Туркиш ерлајнс“ и „Флајдубаи“. „Визер“ ќе добие владина помош за летовите од Скопје до Барселона и Лион кои треба да стартуваат од мај 2025 и до Штутгарт од октомври 2025. „Туркиш ерлајнс“ од 27 март почна со летови меѓу Истанбул и Охрид четири пати неделно.