Се гради повеќе: Лани завршени над 5.400 станови, најмногу во Скопје – порасна и бројот на издадени дозволи за градење

Минатата година деловните субјекти реализирале градежни работи во вредност од речиси 40 милијарди денари и изградиле 2.641 објект, покажуваат најновите податоци на Државниот завод за статистика (ДЗС). Во истиот период биле завршени 5.405 станови со вкупна површина од 348.720 квадратни метри, од кои 5.255 се во индивидуална сопственост. Просечната површина на еден стан изнесувала 64,5 метри квадратни.

Најинтензивно се градело во Скопскиот регион, каде се изградени 807 објекти и завршени 3.566 станови, што го потврдува континуираниот градежен бум во главниот град.

Во исто време, индивидуалните сопственици изградиле 1.978 објекти и завршиле 2.512 станови, со вкупна вредност на градежните работи од 14,4 милијарди денари. Просечната површина на овие станови е значително поголема – 118,1 квадратен метар. Од нив, 152 станови се сместени во викенд-куќи со вкупна површина од 12.879 квадратни метри. Најмногу индивидуални објекти се изградени во Полошкиот регион – 628.

Позитивниот градежен тренд продолжува и оваа година. Само во април 2025 се издадени 357 одобренија за градење – речиси 39% повеќе отколку во април 2024. Со овие одобренија е планирана изградба на 729 станови со вкупна површина од 60.833 квадратни метри. Најмногу нови станови се планирани во Скопскиот (266), Југозападниот (232) и Полошкиот регион (125).

Според структурата на издадените одобренија:

49,6% се однесуваат на објекти од високоградба

17,1% за објекти од нискоградба

33,3% за реконструкција

Во април е забележан и раст на вредноста на предвидените објекти – 6,3 милијарди денари, што е зголемување од 10,7% во споредба со истиот месец минатата година.

Како инвеститори се јавуваат физички лица во 43,1% од случаите, додека деловните субјекти се носители на 56,9% од издадените одобренија.