Се формира нова државна видео лотарија, косопственик е австриски ХТЛ
АД Државна лотарија на Република Северна Македонија вчера регистрираше уште една компанија, во која овој пат косопственик е австрискиот гигант за приредување игри на среќа ХТЛ, дознава „Фактор“. „ХТЛ Македонија“ е фирма-ќерка на Новоматик и ги поседува Мастербет и МА Гаминг во земјата. Новоматик директно го поседува гевгелиското казино коцкарница Макотен.
Новата фирма на АД Државна лотарија и „ХТЛ Македонија“ се вика Нова државна видео лотарија – Ново ВЛТ Доо Скопје и според името може да се заклучи дека дејноста ќе се концентрира на ВЛТ апарати.
Во моментов не е познато како се распоредени уделите, бидејќи станува збор за друштво со ограничена одговорност, а според регистрацијата може да се види дека вкупната основна главнина е 10 милиони евра и дека друштвото е регистрирано на адресата на седиштето на ХТЛ Македонија.
АД Државна лотарија на РСМ веќе е косопственик на една компанија заедно со партнер од Австрија. Државната видео лотарија на Македонија е во сопственост на Државната Лотарија на Македонија и на Касинос Аустриа Интернационал Македонија. Државна видеолотарија на Македонија – Касинос Аустриа ДОО Скопје(ДВЛМ) е трговско друштво со ограничена одговорност за приредување игри на среќа.
За управител на Нова државна видео лотарија – Ново ВЛТ е назначен Ванчо Зунзуровски. Членови на Надзорниот одбор се Перпарим Бајрами, Артин Спахију, Сашо Богдановски, Ленче Петреска и Омер Буњаку.
А.К.
