СДСМ: Владата на ДПМНЕ има пари за авиони и привилегии за функционерите, но не и за зголемување на минималната плата
Од СДСМ обвинија дека премиерот Христијан Мицкоски има пари да рента авион до Будимпешта, а нема за минимална плата од 500 евра.
Велат дека Мицкоски „ја прокоцкал и последна шанса да покаже минимална почит кон граѓаните и трудот на работниците кои живеат многу тешко и едвај врзуваат крај со крај“.
„Денеска и дефинитивно Мицкоски потврди дека е против зголемување на минималната плата за работниците и дека власта на ДПМНЕ нема да преземе ништо за да се покачат платите. Додека граѓаните едвај врзуваат крај со крај, додека илјадници работници живеат во сиромаштија, владата на ДПМНЕ има пари за авиони и привилегии за функционерите, но не и за зголемување на минималната плата. Денеска, Мицкоски дефинитивно потврди дека е против раст на платите и против достоинствен живот на работниците. Со тоа, уште еднаш покажа дека ДПМНЕ нема никаква намера да ги поддржи работниците, туку исклучиво да се грижи за елитата“, велат од СДСМ.
Обвинија дека додека економската состојба во државата драстично се влошува и животниот стандард паѓа, Мицкоски останува рамнодушен и мува не го лази.
„Растот на минималната плата не е само економска неопходност, туку морална обврска! Покачувањето на платите е единствениот начин да се спречи понатамошното осиромашување на граѓаните и да се овозможи економски напредок“, пишува во соопштението.
Од партијата посочуваат дека „СДСМ стои на страна на граѓаните и на работниците“ и дека затоа ќе поднесе закон за зголемување на платите и минималната плата на 500 евра.
Власта го одби синдикалниот предлог за минималец од 500 евра.
