СДСМ: Со Трипуновски и ДПМНЕ на земјоделците им е многу полошо – ВМРО-ДПМНЕ: Земјоделците во Трипуновски и Владата гледаат вистински партнер
Од опозициската СДСМ обвинуваат дека во изминативе 8 месеци Владата на Христијан Мицкоски и ВМРО-ДПМНЕ целосно ги разочарала земјоделците и ги оставила сами.
„Трипуновски покажа како може да се блокира откупот на ориз кој како никогаш досега остана неоткупен со одземање на лиценци за откуп на фирмите. Излажа дека ќе воведе мерка која ќе се однесува на откупувачите и за 1.000 кг откупена и извезена оризова арпа откупувачите ќе добијат 6.000 денари. Досега нема таква мерка. Покажа како се блокираат законите во собранието а преку измените во овие закони за земјоделство ќе се овозможеше поголема финансиска поддршка на земјоделските задруги. Високите цени во лозарството се заслуга на СДСМ, со донесениот нов закон за виното. Факт е дека сите програми и политики кои ги критикуваа ДПМНЕ и Трипуновски како опозиција додека денес полни им се устите како нивно достигнување. Тоа земјоделците најдобро го знаат. ДПМНЕ зборува за развој на сточарството а ги намали субвениите кај кравите од 12.000 дена по крава на само 8.000 денари. Со ДПМНЕ на земјоделците им е само полошо. Едно е јасно а тоа дека ДПМНЕ ниту знае ниту има развојна програма за развој на земјоделството“, велат од СДСМ.
На ова реагираа од ВМРО-ДПМНЕ, кои велат дека ги боли работата на министерот Цветан Трипуновски и владата предводена од ВМРО-ДПМНЕ.
„Оваа Влада предводена од ВМРО-ДПМНЕ посветено работи за доброто на земјоделците. Изминативе неколку месеци се постигна највисока откупна цена за грозјето, со што производната цена на килограм грозје Вранец беше зголемена за 25% и изнесуваше 20,8 ден./кг, додека производната цена на килограм грозје Смедеревка изнесуваше 18,3 ден./кг. Откупната цена за тутун се зголеми од 375 на 400 денари за откупен тутун прва класа, додека пак субвенцијата за првата класа на тутун од 80 денари се покачи на 100 денари. Поради лошите политики на СДС, Министерството за земјоделство, шумарство и водостопанство и Владата на ВМРО-ДПМНЕ излегоа во пресрет на орзопроизводителите и се одделија дополнителни 6 денари за откупена килограм оризова арпа од реколта 2024 година. За какви субвенции говори СДС, за оние што им ги должеше на земјоделците со години? По самото доаѓање на ВМРО-ДПМНЕ на власт се исплатија сите заостанати субвенции кои што им ги должеше Владата на СДС. Субвенциите за сточарите се покачени, а за тоа од СДС можат да си најмат и математичар кој ќе им пресмета. Незаинтересираноста на Николовски и СДС, Македонија ја направија увозно зависна земја за храна. Со работа и добра стратегија, министерот Трипуновски и Владата предводена од ВМРО-ДПМНЕ земјоделството ќе го вратат на пиедесталот. Македонија повторно ќе стане извозник на земјоделски производи. Земјоделците во оваа Влада гледаат сериозен партнер“, велат од ВМРО-ДПМНЕ.
