СДСМ до Мицкоски: Брука и срамота, Вабтек не е нова инвестиција
СДСМ се огласи со реакција,откако вчера премиерот Христијан Мицкоски објави дека „Вабтек“ ќе инвестира 35 милиони евра во нова фабрика во индустриската зона во Скопје за сопирачки за шински возила.
Од СДСМ реагираат дека не станува збор за нова инвестиција, туку за производител кој долго време работи во кругот на некогашен Металски завод „Тито“.
„Христијан Мицкоски и ВМРО-ДПМНЕ продолжуваат бесрамно да ја манипулираат јавноста со наводни нови инвестиции, но овој пат со потег кој е целосно потценување на интелегенција на граѓаните. Наводно новата инвестиција на Мицкоски е компанија која 16 години веќе работи во Македонија.
Станува збор за барање на компанијата Вабтек за проширување на операциите во државата. За ова нивно барање се водеше постапка одамна во рамки на институциите кај нас при што заради негативно мислење на Комисијата за заштита на конкуренција тоа не се реализираше. Во рамки на овој процес имаше и судска постапка.
ВМРО-ДПМНЕ изгледа смешно и наивно со своите промоции. Во отсуство на реална и сериозна дипломатска агенда на Самитот на НАТО, Мицкоски ја замајува јавноста со лажни ПР промоции. И кога веќе е решен да манипулира, го повикуваме исто така да ги објави условите под кои ќе го проширува производството компанијата Вабтек и што точно е договорено со компанијата“,реагираат од СДСМ.
Доскорешниот директор на ТИРЗ, Јован Деспотовски, синоќа ја поздрави намерата за инвестирање на „Вабтек“. Оваа компанија веќе подолго време работи со загуби, но истовремено сака да издаде акции за зголемување на главнината. За Комисијата за заштита на конкуренцијата спорно е тоа што овој инвеститор сака да добива државна помош со работење во индустриските зони,кога веќе има капацитет кој работи во Скопје.
Градежен институт Македонија за корпорацијата веќе изработува основен проект за нова фабрика во рамките на ТИРЗ Скопје 2. Поради големината на планираните содржини на проектот, планирано е четири парцели да се спојат во една голема парцела. Самиот објект е планиран да се гради фазно, во првата фаза предвиден е административен дел од 4700м² и производствен дел од 17100м², а во втората фаза предвидени се дополнителни 9600м².