СДСМ бара одговорност за трагедијата во Кочани: „Власта го штити вистинските виновници“
Соопштението на СДСМ ја отвора јавната дебата за трагедијата во Кочани, каде животот го загубија 62 деца, а над 200 беа повредени, со силен повик до Обвинителството да преземе конкретни мерки и да ги гони сите одговорни, без исклучок.
Според партијата, истрагата што ја води Обвинителството е затворена без да има ниту еден обвинет функционер од актуелната власт, што според СДСМ покажува намерна заштита на виновниците.
Во соопштението се посочуваат прашања за одговорноста на клучни лица, меѓу кои е началничката на ОВР Кочани, Марија Цветковска Маневска, која не презела мерки иако имало службени белешки за незаконската работа на дискотеката „Пулс“. Исто така, се истакнува дека сменоводителот во МВР, Драган Казак Петрушев, за кого постојат индиции дека учествувал во затворањето на вратите на дискотеката спротивно на процедурите, не е опфатен со истрагата.
СДСМ ја поставува и дилемата дали Петрушев е заштитен поради политичката припадност кон ВМРО-ДПМНЕ, како и дали Дејан Салтировски, началник на СВР Штип, кој е поврзан со сомнежи за фалсификати во документацијата и кумовски врски со блиски луѓе на лидерот на ВМРО-ДПМНЕ, е недопирлив.
„Родителите кои ги загубија своите деца заслужуваат правда и одговорност, а не политичка заштита на виновниците“, се наведува во соопштението од Центарот за комуникации на СДСМ.
Партијата повикува Обвинителството да се ослободи од политички влијанија и да постапува независно, барајќи одговорност за сите кои се виновни за трагедијата што го зави Кочани и Македонија во црно.
