„Сакам да работам“ до „Шанса за Центар“: Не терајте дневна политика со игрите на среќа, така не се заштитува младината

Здружението на вработени во секторот игри на среќа „Сакам да работам“, во врска со денешната објава на политичката групација „Шанса за Центар“ за бројот на легални објекти за игри на среќа на територијата на Општина Центар, смета дека во интерес на објективно информирање на јавноста е важно да го потенцираме следното:

Легалните игри на среќа веќе со години се предмет на невидена негативна кампања во која се користат сите дозволени и недозволени средства за оцрнување и обид за нивно дефинирање како најголеми општествени штетници. Притоа, свесно се игнорираат аргументите кои јасно и недвосмислено, преку конкретни примери од соседството, ставаат до знаење какви последици имаат државите каде игрите на среќа биле забранети одреден временски период. Она што е симптоматично е што различни политички актери упорно се обидуваат да печалат поени на темата игри на среќа, манипулирајќи со податоци кои внесуваат страв и паника меѓу родителите создавајќи лажна перцепција дека приредувачите на легалните игри на среќа имаат економски интерес малолетници да влегуваат во нивните објекти. Можеме да ги броиме објектите за игри на среќа во центрите на повеќе европски метрополи, но не сметаме дека тоа е вистинската аргументација за тоа дали тоа е формулата за заштита на младината.

Ние одамна тврдиме дека барањата за дислокација на  легалните објекти за игри на среќа, со воведување на дистанца од училиштата и верските објекти или нивно дислоцирање надвор од урбаните средини, што во една или друга варијанта е вовед во нивно целосно затворање, секако е внесување на приредувањето на игри на среќа во црна зона во која ќе почнат да се организираат во подруми, како во 90-те години од минатиот век, без никаква контрола од државата, каде младината ќе биде под поголем ризик. Во Македонија се применува Закон за игри на среќа, кои е еден од најстрогите на Балканот и содржи европски и светски стандарди за регулирање на оваа економска гранка, а особено за забрана на влез на малолетници во сите легални објекти со лиценци за приредување игри на среќа. Во Албанија уште од октомври 2022, нивниот Премиер се откажа од забраната на игрите на среќа, со образложение дека тамошната забрана предизвикала епидемија од организирање игри на среќа на црно.

Како Здружение не сме против да се изнајдат решенија кои ќе дадат одговори на грижите на граѓаните. И меѓу нас има родители на малолетници и затоа воопшто не ни е пријатно кога законската дејност во која го вадиме лебот некој упорно сака да ја претстави како штетник за младите. Меѓутоа, сите критичари на легалните игри на среќа треба секогаш да ги имаат во предвид следните факти. Затворањето на легалните игри на среќа по автоматизам ќе предизвика отворање на диви играчници каде младите ќе бидат под далеку поголем ризик. Младите преку мобилните уреди се под перманентна закана од различни нелегални платформи за онлајн игри на среќа. Заблуда е дека излозите на легалните игри на среќа ги привлекуваат да играат, бидејќи по истата логика ќе треба да се затворат сите кафулиња и тобака за да минувачите немаат никаков визуелен контакт со никотин и алкохол. Сите форми на приредувачи на игри на среќа вработуваат речиси 10 илјади граѓани и се најголем приватен работодавец во Македонија и секоја година во Буџетот од легалните приредувачи се слеваат на приходната страна најмалку 280 милиони евра. Доколку се затворат легалните игри на среќа сите ние стануваме кандидати за иселување во ЕУ, каде повторно ќе работиме во истата дејност за која стручно сме се усовршиле овде.

Нашата порака е: Младината не се заштитува со внесување на игрите на среќа во дневна политика!