САКААТ ДА НАПРАВАТ ПЛАНИНА ОД ЕДНО РИТЧЕ: Може ли Грција да ги искомплицира евроинтеграциите на Албанија?

Да не станеме заложници на внатрешната племенска политика, му порача албанскиот премиер Еди Рама на грчкиот колега Кирјакос Мицотакис. 

Рама реагираше во врска со неформалната средба што Мицотакис ја свика со лидерите на Западен Балкан, на која учествуваа и шефицата на Европската комисија Урсула фон дер Лајен и претседателот на Европскиот совет Шарл Мишел, на која тој не беше поканет.  Албанија беше поканета на ниво на претседател, но претседателот Бајрам Бегај, одби да оди поради „претходно утврдена агенда“.

Рама пишува дека не реагирал порано, затоа што не сакал да ги вознемирува домаќините и гостите „ со дополнување на вревата пред моите добри пријатели собрани во Атина за да си ја завршат работата“.

Рама изјави дека следниот октомври Албанија ќе претседава со годинешниот Самит на Берлинскиот процес во Тирана и обраќајќи му се на Мицотакис додава дека „многу почитуваниот колега во Атина е поканет да учествува и никогаш не можам да замислам да одговорам идентично, поканувајќи го наместо него, грчкиот претседател, кон кого имам најголема почит“.

Додава дека го разбира притисокот од трети страни, желни да ја искористат секоја прилика да направат планина од едно ритче.

Главната причина што Рама не беше поканет во Атина е прашањето „Белери“, кое се однесува на апсењето под сомение за изборна корупција и задржувањето во притвор на градоначалникот на Химара, Фреди Белери, припадник на грчкото малцинство.

Белери е уапсен на 12 мај, два дена пред локланите избори, на кои иако во притвор тој беше реизбран на функцијата градоначалник.

Припадниците на грчкото мацинство организираа протест во Химара со барање за ослободување. 

Министерот за труд и социјала на Грција Адонис Георгиадис се закани во однос на членството на Албанија во ЕУ, но и дека Албанија ќе ги заборави парите од ЕУ.