САД ВОВЕДУВА САНКЦИИ ЗА НАФТЕНАТА ИНДУСТРИЈА НА СРБИЈА: Ова ќе ја погоди економијата

САД воведоа санкции за Нафтената индустрија на Србија(НИС).

Американското Министерство за финансии денеска донесе одлука за воведување санкции, како што се очекуваше, јавија српските медиуми. Конкретните мерки се испратени до српскиот државен врв.

Србија има рок од 30 дена да ја разгледа ситуацијата. Има неколку проблеми, а се издвојуваат два: проблеми во самото снабдување со нафта и проблеми со Рафинеријата и Петрохемија и други гиганти кои директно ќе се одразат на економијата.

Српскиот претседател Александар Вучиќ денеска на состанок во Претседателството  повика неколку министри и целиот свој кабинет, како и сите експерти од енергетскиот сектор.

Санкциите беа наметнати и според Извршниот налог 13662 – „Блокирање на имотот на дополнителни лица кои придонесуваат за ситуацијата во Украина“.

Во одлуката се наведува дека се воведени санкции за НИС поради поврзаноста со Гаспромњефт. Најголем акционер на НИС е Гаспромњефт, кој има 50 отсто од сопственоста на компанијата, додека 6,15 отсто и припаѓаат на нејзината матична компанија Газпром. Република Србија поседува 29,87 отсто од капиталот, а 13,98 отсто од компанијата е во сопственост на мали акционери.