САД стопираат нови студентски визи – се засилуваат проверките на социјалните мрежи
Администрацијата на американскиот претседател Доналд Трамп издаде наредба амбасадите на САД да престанат со закажување термини за издавање студентски визи. Оваа мерка се применува паралелно со подготовките за проширување на процедурите за безбедносни проверки, особено на активностите на студентите на социјалните мрежи.
Според меморандумот што го добиле дипломатските претставништва, државниот секретар Марко Рубио информирал дека паузата во процесирањето визи ќе трае „до издавање на нови насоки“. Тој потврдил дека проверките на социјалните мрежи ќе бидат засилени и за студентските визи и за визите за програми за размена.
Одлуката доаѓа откако претседателот Трамп обвини дел од американските универзитети дека се премногу „левичарски“ и дека промовираат антисемитизам. Тој неодамна се обиде да го спречи „Харвард“ да запишува странски студенти – мерка чие спроведување привремено го блокираше федерален судија.
