„САД секојдневно разговараат со Кина”: Дали следи договор за царини?

Администрацијата на претседателот на Соединетите Американски Држави, Доналд Трамп, води секојдневни разговори со Кина за царините, изјави денеска американскиот министер за земјоделство Брук Ролинс.

Таа за Си-Ен-Ен изјави дека разговорите меѓу двете земји се во тек и дека трговските договори со другите земји треба да се постигнат многу брзо.

„Секој ден разговараме со Кина и со другите 99, 100 земји кои седнаа на преговарачка маса“, рече Ролинс.

Реципрочните американски тарифи за повеќето земји беа одложени за 90 дена за преговорите на 9 април, освен за Кина, која не се однесува на универзалната царина од 10 отсто што стапи на сила, ниту на царините за автомобили, алуминиум и челик.

САД воведоа царини за кинески производи од 145 отсто, додека Кина воведе царини од 125 отсто за американски производи.

Европската унија привремено ги прекина планираните контрамерки, но предупреди дека ќе ги воведе доколку преговорите не бидат успешни.

Од 3 април, САД применуваат царина од 25 отсто за увоз на патнички автомобили, вклучувајќи седани, теренци, мини комбиња, комбиња и лесни камиони.

Тарифата од 25 отсто се однесува и на клучните автомобилски делови, како што се мотори, менувачи, делови за погонска единица и електронски компоненти, а таа тарифа ќе стапи на сила најдоцна до 3 мај.

За возилата што ги исполнуваат условите од договорот САД-Мексико-Канада, постои можност царината од 25 проценти да се применува само на делот од вредноста што не потекнува од САД, но доколку се утврди дека вредноста на американската содржина е преценета, царината се применува на целата вредност на возилото.

Од 12 март, САД применуваат царини од 25 отсто за целиот увоз на челик и алуминиум, без исклучоци за која било земја.